Aceto Balsamico Tradizionale di Modena DOP þroskað (Affinato)

Ef þú spyrð hvaða hráefni fari í Aceto Balsamico Tradizionale di Modena DOP færðu líklega svarið vínber, tími og ævaforn þekking, sú sem gengur oft að erfðum frá einni kynslóð til annarrar ásamt ástríðunni. Ekkert er látið ráðast af tilviljun við framleiðslu balsamediksins, þar sem hvert skref fylgir hinu í nákvæmri röð. Sama á við um tunnurnar sem geyma þennan dýrmæta elixír: frá þeirri stærstu til þeirrar minnstu, í nákvæmlega réttan tíma. Eik, kastanía, mórberjatré, kirsuberjatré, einir: hver viðartegund gefur balsamedikinu einstaka eiginleika og á sinn þátt í að umbreyta því í það sælkeralostæti sem er bæði þekkt og í hávegum haft um allan heim.

Eftir lengd þroskunartímans, sem er aldrei skemmri en 12 ár, er um tvo gæðaflokka að velja þegar þú leitar að því sem hentar þér og borðinu þínu fullkomlega.

Þroskað Aceto Balsamico Tradizionale di Modena DOP (Affinato)

Fágað en ákveðið, ríkulegt en í góðu jafnvægi og fært um að umbreyta hvaða rétti sem er. Þetta er þroskað Aceto Balsamico Tradizionale di Modena DOP. Það er yngra en „extravecchio“ (sérlega lengi þroskaða) gerðin og er dásamlegt meðlæti með steikum og soðnu kjöti. Einnig má minna á hversu einstaklega vel það fer með Parmigiano Reggiano. Prófaðu það með ávöxtum, sérstaklega jarðarberjum, eða njóttu þess að umbreyta alls kyns salötum, þar á meðal hrísgrjónasalötum. Láttu tillögur að framreiðslu ekki setja þér mörk, haltu áfram að prófa þig áfram og uppgötva nýjar samsetningar sem þú munt falla fyrir.

INNIHALDSEFNI: 100% soðið þrúgumust. FRAMLEITT Á ÍTALÍU.